Услови на користење

Овој документ е достапен и на англиски јазик. Во случај на несовпаѓање, македонската верзија е меродавна.

Овие Услови на користење („Услови“) ја уредуваат употребата на софтверската услуга достапна на popolni.mk („popolni.mk“, „услугата“). Услугата ја нуди Друштво за менаџмент и бизнис консалтинг ПРОБИС-КОНСАЛТ ДООЕЛ Скопје, ЕМБС 7513615, ЕДБ 4057021555700, со седиште на ул. Драгутин Аврамовски Гуте бр. 32, Општина Карпош, Скопје („ние“, „нас“). „popolni.mk“ е трговски назив на услугата.

Со креирање сметка, прифаќање на овие Услови во апликацијата, активирање претплата, плаќање или користење на услугата, потврдувате дека сте овластени да ја застапувате вашата канцеларија и да прифатите договор во нејзино име.

Со прифаќањето на овие Услови, ја прифаќате и Политиката за приватност, како и Анексот за обработка на лични податоци што е составен дел на овие Услови. Доколку не се согласувате со нив, не ја користете услугата.

1. Што е услугата

popolni.mk е софтверска услуга што им помага на нотарски, адвокатски и сметководствени канцеларии побрзо да пополнуваат документи што веќе ги користат во работата.

Вие поставувате документ што веќе го користите во вашата работа. popolni.mk препознава кои делови од документот се менуваат од еден предмет, клиент или странка до друг, а потоа ги пополнува со податоците што ги внесувате. На крај добивате готова Word датотека.

Изгледот, структурата и форматирањето на вашиот документ остануваат како што сте ги поставиле.

2. Сметки и пристап

popolni.mk се користи со покана. Сметките ги отвораме ние, поединечно за секоја канцеларија.

Вие сте одговорни за чување на пристапните податоци и за сите активности што се извршени преку вашата сметка.

Доколку се посомневате дека некој неовластено пристапил до вашата сметка, известете нè веднаш.

3. Прифатлива употреба

Кога ја користите услугата, не смеете:

• да ја препродавате, изнајмувате или отстапувате услугата на трети лица без наша претходна писмена согласност;
• да ја користите услугата спротивно на закон или за обработка на податоци за кои немате правен основ;
• да се обидувате да ја нарушите безбедноста на системот, да го преоптоварите или на друг начин да му наштетите;
• да внесувате содржина со која се повредуваат права на трети лица;
• да вршите обратно инженерство, расклопување, копирање или неовластено менување на софтверот.

4. Ваша содржина и ваша одговорност

Содржината што ја внесувате во popolni.mk (документи за пополнување, слики, скенови, аудиозаписи, текст и други материјали) останува ваша. Ние не стекнуваме сопственички права врз неа.

Вие сте одговорни за законитоста, точноста и правото да ги обработувате податоците што ги внесувате, вклучувајќи ги и личните податоци на вашите странки, клиенти или соработници.

За тие лични податоци, вашата канцеларија е контролор, а popolni.mk е обработувач. Оваа обработка се уредува со Анексот за обработка на лични податоци што е составен дел на овие Услови, и со нашата Политика за приватност.

5. Улогата на popolni.mk и точноста на документите

popolni.mk ги пренесува во вашиот документ податоците што ги внесувате или што се прочитани од документите што сте ги поставиле. Читањето се врши преку автоматизирана обработка, а пронајдените податоци се внесуваат во соодветните полиња.

popolni.mk не дава правен, сметководствен или друг професионален совет. Услугата не одлучува наместо вас, не толкува факти и не ја презема вашата професионална одговорност.

popolni.mk не пополнува податоци по сопствена процена. Ако некој податок не може да се пронајде, полето останува празно.

Последната проверка секогаш е ваша. Ниту еден документ не се смета за конечен додека вие не го прегледате, потврдите и преземете. Вие одговарате за содржината на документите што ги користите, издавате или доставувате.

6. Претплата, цени и плаќање

Услугата се нуди како месечна претплата, според обемот на документи што ги преземате. Конкретните услови се договараат при поставување на сметката за секоја канцеларија.

Првите 50 преземања се бесплатни за проба, без обврска. Пробниот период го активираме рачно за вашата сметка.

Платените износи не се враќаат, освен ако со закон или со посебен договор не е определено поинаку.

Доколку претплатата не биде платена навреме, можеме да го ограничиме или прекинеме пристапот до услугата, по претходно известување.

7. Интелектуална сопственост

Софтверот popolni.mk, неговиот код, дизајн, структура, функционалности, називи и сите поврзани права остануваат наша сопственост.

Овие Услови ви даваат ограничено, непреносливо и неисклучиво право да ја користите услугата додека трае вашата претплата.

Не смеете да го копирате, менувате, продавате, лиценцирате, расклопувате или на друг начин неовластено да го користите софтверот.

8. Доверливост

Двете страни се обврзуваат како доверливи да ги чуваат деловните, техничките и другите информации што ќе ги добијат во текот на соработката.

Оваа обврска не се однесува на информации што се јавно достапни, што веќе биле познати на страната што ги примила или што мора да се откријат врз основа на закон, судска одлука или барање од надлежен орган.

9. Достапност на услугата

Се трудиме popolni.mk да биде достапен и да работи стабилно, но не гарантираме дека услугата секогаш ќе биде непрекината, без грешки или без технички прекини.

Можеме да вршиме одржување, надградби или промени на функционалностите. За позначајни прекини, кога е можно, ќе ве известиме однапред.

10. Ограничување на одговорност

Услугата се нуди во состојбата во која е достапна. Не гарантираме определен деловен, правен или друг резултат надвор од функцијата на услугата: пренесување на внесените и прочитаните податоци во вашиот документ.

Не одговараме за индиректни, последични или споредни штети, за изгубена добивка, изгубени приходи, прекин на работа или загуба на податоци, доколку тие настанале надвор од наша контрола.

Во рамките дозволени со закон, нашата вкупна одговорност е ограничена на повисокиот од следниве два износа:

• износот што сте го платиле за услугата во дванаесетте месеци пред настанот од кој произлегла одговорноста; или
• 6.000 денари.

Овие ограничувања не важат за штета предизвикана со намера или груба небрежност, ниту за одговорност што според задолжителни прописи не може да се ограничи или исклучи.

11. Раскинување

Можете да ја откажете претплатата во согласност со договорените услови.

По престанокот на претплатата, пристапот до услугата престанува. Ви препорачуваме навреме да ги преземете документите што ви се потребни.

По престанокот на соработката, вашите податоци ги бришеме или анонимизираме согласно Политиката за приватност, освен кога закон бара да се чуваат подолго.

12. Заштита на лични податоци и обработка во име на канцеларијата

Обработката на лични податоци е опишана во нашата Политика за приватност.

Кога popolni.mk обработува податоци за вашата корисничка сметка, наплата, поддршка и безбедност, popolni.mk настапува како контролор.

Кога преку услугата внесувате документи за пополнување, други документи, слики, скенови, аудиозаписи, текст или други материјали што содржат лични податоци на ваши странки, клиенти, вработени или соработници, вашата канцеларија е контролор, а popolni.mk е обработувач.

Условите под кои popolni.mk ги обработува тие податоци во име на вашата канцеларија се уредени со Анексот за обработка на лични податоци подолу. Тој Анекс е составен дел на овие Услови и се прифаќа електронски заедно со нив. Не е потребно посебно рачно потпишување, освен ако страните изречно не се договорат поинаку.

13. Измени на Условите

Можеме да ги менуваме овие Услови. При значајни промени ќе ве известиме преку е-пошта или преку известување во апликацијата.

Доколку продолжите да ја користите услугата по стапување во сила на измените, се смета дека ги прифаќате новите Услови.

Ако значајна измена суштински ги намалува вашите права, можете да ја откажете претплатата пред измената да стапи во сила. Изменетите Услови не влијаат на веќе платениот период, освен ако тоа не го бара закон.

14. Меродавно право и надлежност

Овие Услови се толкуваат и применуваат според законите на Република Северна Македонија.

За сите спорови што нема да можат да се решат спогодбено, надлежни се судовите во Скопје, во согласност со задолжителните прописи.

15. Контакт

За прашања во врска со овие Услови, можете да нè контактирате на:

• Е-пошта: kontakt@popolni.mk
• Телефон: 071 237 331

Друштво за менаџмент и бизнис консалтинг ПРОБИС-КОНСАЛТ ДООЕЛ Скопје, ЕМБС 7513615, ЕДБ 4057021555700, ул. Драгутин Аврамовски Гуте бр. 32, Општина Карпош, Скопје, Северна Македонија.

Анекс за обработка на лични податоци

Овој Анекс за обработка на лични податоци („Анекс“) е составен дел на Условите на користење на popolni.mk. Со прифаќањето на Условите, канцеларијата го прифаќа и овој Анекс.

1. Улоги на страните

Во однос на личните податоци што ги внесувате во popolni.mk како дел од документи за пополнување, други документи, слики, скенови, аудиозаписи, текст, разговори во апликацијата или други материјали („Содржина на канцеларијата“), вашата канцеларија е контролор, а popolni.mk е обработувач.

popolni.mk ги обработува тие податоци само во име на канцеларијата и според нејзините документирани упатства.

Во однос на податоците потребни за корисничката сметка, наплата, поддршка, безбедност и управување со услугата, popolni.mk настапува како контролор, согласно Политиката за приватност.

2. Предмет и времетраење на обработката

Предмет на обработката е овозможување на услугата popolni.mk: поставување документи за пополнување, читање внесени материјали, извлекување релевантни податоци, пополнување документи, создавање готови Word датотеки, техничка поддршка, безбедност, резервни копии и одржување на системот.

Обработката трае додека канцеларијата ја користи услугата и потоа само онолку колку што е потребно за бришење, враќање, резервни копии, законски обврски или заштита од правни побарувања, согласно Политиката за приватност.

3. Природа и цел на обработката

Обработката се врши автоматизирано и електронски.

Целта на обработката е popolni.mk да може да ја изврши услугата што ја бара канцеларијата: пополнување документи врз основа на документите и податоците што ги внесува.

popolni.mk не ги користи податоците од Содржината на канцеларијата за рекламирање, препродажба, профилирање или за сопствени цели што не се поврзани со услугата.

4. Видови лични податоци

Во зависност од документите што ги внесува канцеларијата, може да се обработуваат следниве видови лични податоци:

• име и презиме;
• адреса;
• ЕМБГ или друг идентификациски број;
• податоци од лични документи;
• контакт податоци;
• потпис;
• податоци за странки, клиенти, полномошници, застапници, вработени или соработници;
• податоци содржани во изјави, договори, потврди, извештаи и други документи;
• други податоци што канцеларијата самата ќе ги внесе во услугата.

popolni.mk не одредува кои податоци ќе бидат внесени. Тоа го одредува канцеларијата како контролор.

5. Категории на субјекти на лични податоци

Може да се обработуваат лични податоци на:

• странки и клиенти на канцеларијата;
• полномошници, застапници и овластени лица;
• вработени и соработници;
• контакт лица;
• други лица чии податоци се содржани во документите што канцеларијата ги внесува.

6. Документирани упатства

Канцеларијата му дава упатства на popolni.mk преку:

• овие Услови и овој Анекс;
• поставките и дејствата во апликацијата;
• документите и податоците што ги внесува;
• барањата за поддршка што ги испраќа до popolni.mk.

popolni.mk ги обработува личните податоци само според тие упатства, освен ако обработката е потребна според закон. Доколку popolni.mk смета дека некое упатство го прекршува законот или прописите за заштита на лични податоци, ќе ја извести канцеларијата.

7. Доверливост

popolni.mk обезбедува лицата што имаат пристап до лични податоци да бидат обврзани на доверливост или да имаат законска обврска за доверливост.

Пристап до податоците имаат само лица на кои тој пристап им е потребен за обезбедување, одржување, безбедност или поддршка на услугата.

8. Безбедносни мерки

popolni.mk применува соодветни технички и организациски мерки за заштита на личните податоци, вклучувајќи:

• шифрирана комуникација преку HTTPS/TLS;
• чување на податоците на заштитени сервери;
• ограничување на пристапот по канцеларија;
• контрола на пристап до системите;
• чување на лозинки само како криптографски отпечаток;
• резервни копии;
• мерки за доверливост, интегритет и достапност на системот;
• следење и одржување на безбедноста на услугата.

Подетален опис на безбедносните мерки е даден во Политиката за приватност и може да биде доставен на барање, во разумен обем.

9. Подобработувачи

Канцеларијата му дава на popolni.mk општо овластување да ангажира подобработувачи кога тоа е потребно за обезбедување на услугата.

Тековната листа на подобработувачи е наведена во Политиката за приватност. popolni.mk ќе ја извести канцеларијата за планирана промена на подобработувачите преку е-пошта, известување во апликацијата или објава во Политиката за приватност.

Канцеларијата има право да поднесе разумен приговор на нов подобработувач. Доколку страните не најдат прифатливо решение, канцеларијата може да престане да ја користи услугата.

popolni.mk со подобработувачите склучува договори со кои им се наложуваат обврски за заштита на личните податоци најмалку во обем потребен за исполнување на овој Анекс.

popolni.mk останува одговорен пред канцеларијата за исполнувањето на обврските на подобработувачите.

10. Пренос надвор од Северна Македонија и Европската Унија

Кога за обезбедување на услугата е потребен пренос на лични податоци надвор од Северна Македонија или Европската Унија, popolni.mk применува соодветни заштитни мерки согласно важечките прописи, вклучувајќи стандардни договорни клаузули или други дозволени механизми.

Податоците не се пренесуваат на трети страни за маркетинг, рекламирање или препродажба.

11. Помош на канцеларијата

Земајќи ја предвид природата на обработката, popolni.mk ќе ѝ помогне на канцеларијата, во разумен обем, за:

• остварување на правата на субјектите на лични податоци;
• бришење, исправка или ограничување на податоци кога тоа е технички возможно;
• исполнување на обврските за безбедност на обработката;
• проценка на влијанието врз заштитата на личните податоци, кога тоа е применливо;
• постапување при безбедносен инцидент.

Кога барањето се однесува на лични податоци на странки внесени од канцеларијата, канцеларијата останува одговорна за одговорот кон субјектот на личните податоци, а popolni.mk помага како обработувач.

12. Безбедносни инциденти

Доколку popolni.mk дознае за нарушување на безбедноста на личните податоци што се обработуваат во име на канцеларијата, ќе ја извести канцеларијата без непотребно одложување.

Известувањето ќе содржи информации што му се достапни на popolni.mk и што разумно се потребни за канцеларијата да може да ги исполни своите законски обврски.

13. Бришење или враќање на податоците

По престанок на користењето на услугата, popolni.mk ќе ги избрише или анонимизира личните податоци од Содржината на канцеларијата согласно Политиката за приватност, освен ако закон бара податоците да се чуваат подолго.

Канцеларијата треба навреме да ги преземе документите што ѝ се потребни пред престанокот на услугата.

14. Информации и проверка

popolni.mk ќе ѝ стави на располагање на канцеларијата разумни информации потребни за докажување на исполнувањето на обврските од овој Анекс.

Доколку е потребна дополнителна проверка, страните ќе се договорат за разумен начин, време и обем на проверката, водејќи сметка за безбедноста, доверливоста, деловните тајни и правата на други корисници.

15. Важност на Анексот

Овој Анекс важи додека popolni.mk обработува лични податоци во име на канцеларијата.

Во случај на противречност меѓу овој Анекс и друг дел од Условите, за обработката на лични податоци во име на канцеларијата ќе важи овој Анекс.